Kiyev artıq yeni sülh planına deyil, Kremlə təzyiqin artırılmasına üstünlük verir
Ukrayna Rusiya ilə müharibənin başa çatdırılması ilə bağlı yanaşmasını dəyişib.
Bu barədə “The New York Post” nəşri yazıb.
Nəşrin yazdığına görə, Kiyev artıq konkret sülh planını irəli sürmək əvəzinə, Kremlə siyasi, iqtisadi və hərbi təzyiqin gücləndirilməsinə fokuslanır. Bildirilir ki, prezident Vladimir Zelenski NATO sammiti çərçivəsində ABŞ prezidenti Donald Trampla görüşə də məhz bu yanaşma ilə gedir.
Nəşrin məlumatına görə, ABŞ-nin dəstəklədiyi 28 bəndlik sülh layihəsi artıq danışıqların əsas mövzusu deyil. Hazırda nə ABŞ-Ukrayna-Rusiya formatında üçtərəfli sammit, nə də yeni sülh sənədi üzrə strukturlaşdırılmış danışıqlar hazırlanır.
Ukraynanın ABŞ-dəki səfiri Olqa Stefanişina bildirib ki, cəbhədə vəziyyətin dəyişməsi Kiyevə müharibənin başa çatdırılması məsələsinə daha çevik yanaşmağa imkan verir. Onun sözlərinə görə, atəşkəs yalnız vahid sülh planı ətrafında uzun müzakirələrin nəticəsi olmaya da bilər və başqa yollar da mövcuddur.
Nəşr yazır ki, Vaşinqtonda da Rusiyanın müharibəni dayandırmaq niyyətinə inam getdikcə azalır. Ukrayna rəsmiləri hesab edirlər ki, Moskvanı mövqeyini dəyişməyə məcbur etmək üçün əsas vasitə Kremlə təzyiqin artırılması olmalıdır. Eyni zamanda, Zelenski NATO sammitində Ukraynanın Avropanın gələcək təhlükəsizlik sistemində və Alyans üçün əvəzolunmaz tərəfdaş olduğunu da vurğulamağı planlaşdırır.
