Süni intellekt artıq insanların yazı və danışıq tərzinə təsir göstərir. Eyni zamanda, mətnin insan, yoxsa süni intellekt tərəfindən yazıldığını müəyyənləşdirmək əvvəlkindən daha çətin olub.
Moderator.az xəbər verir ki, bu barədə “The Guardian” nəşri yazıb.
Süni intellekt dilə təsir etməyə başlayıb
Nəşrin yazdığına görə, müasir süni intellekt modelləri təkcə insan üslubunu uğurla təqlid etmir, həm də dilin inkişafına təsir göstərir. Dilçilər hesab edir ki, insanların çoxu süni intellektin yazdığı mətnləri tanıya bildiyini düşünsə də, reallıq fərqlidir.
Lankaster Universitetinin məhkəmə dilçiliyi üzrə professoru Kler Hardakerin sözlərinə görə, “Botdur, yoxsa yox?” testində iştirakçılar mətnin müəllifini cəmi 60 faiz hallarda düzgün müəyyən edə bilirlər.
Mətni süni intellektin yazdığını sübut etmək çətindir
Ekspertlər bildirir ki, şablon ifadələr, uzun tirelər və ya eyni fikrin üç oxşar sözlə ifadə olunması süni intellektin əsas əlamətləri hesab edilsə də, bunlardan insanlar da uzun illərdir istifadə edirlər. Çünki böyük dil modelləri məhz insan mətnləri əsasında öyrədilib.
Mütəxəssislər qeyd edir ki, hazırda heç bir konkret ifadə və ya yazı üslubu mətnin mütləq süni intellekt tərəfindən yazıldığını sübut etmir. Bundan əlavə, süni intellektin hazırladığı mətn sonradan redaktə edilərək daha təbii görünə bilər. Buna görə də mövcud süni intellekt detektorlarının da səhv nəticə verməsi mümkündür.
İnsan yaradıcılığı hələ də üstün hesab olunur
Araşdırmalar göstərir ki, ChatGPT-nin populyarlaşmasından sonra insanların yazılarında da süni intellektin tez-tez istifadə etdiyi bəzi sözlər daha çox görünməyə başlayıb. Bu isə insanlarla süni intellekt arasında qarşılıqlı təsirin artıq dilə də sirayət etdiyini göstərir.
Bununla belə, ekspertlər hesab edir ki, müasir süni intellekt qrammatika və məntiqi mətn qurmaqda uğurlu olsa da, dərin emosiyalar, orijinal üslub və gözlənilməz bədii həllər yaratmaq baxımından hələ də insan müəllifdən geri qalır. Onların fikrincə, məhz bu xüsusiyyətlər insan yaradıcılığını süni intellektdən fərqləndirməyə davam edəcək.
