Hakimin mediasiyaya yönləndirdiyi iş uğurla nəticələnib.
Monitorinq.az E-huquq.az-a istinadən xəbər verir ki, uğurlu mediasiya sessiyası 21 aprel 2025-ci il tarixində Bakı 8 saylı Mediasiya Təşkilatında baş tutub.
Belə ki, Bakı şəhəri Nəsimi Rayon Məhkəməsinin hakimi Həbibə xanım Miriyeva icraatında olan və bir ildən artıq müddətdə davam edən mürəkkəb əmək mübahisəsini hakimin təşəbbüsü və tərəflərin vəkillərinin razılığı ilə mediasiyaya yönəldilib.
Mediasiya sessiyası təcrübəli mediator Mətanət Şahbazova tərəfindən aparılıb. Mübahisə tərəflərini vəkillər – Aysel Yüsif qızı Məhərrəmova və Turqay Ariz oğlu Babayev təmsil edib.Tərəflərin razılığı əsasında “Barışıq sazişi” bağlanıb və əmək mübahisəsi məhkəmədən kənar qaydada tez bir zamanda, qarşılıqlı razılaşma əsasında uğurla həll edilib.
Qeyd edək ki, qanunvericiliyin tələbinə əsasən, bu kimi hallarda məhkəmə mübahisə üzrə işinin icraatına da xitam verir.
Mediasiyanın əsas üstünlüyü ondan ibarətdir ki, burada udan və ya uduzan və tərəf olmur – razılaşma şərtlərini tərəflər birgə qəbul edir və nəticə hər iki tərəf üçün qənaətbəxş olur. Bu cür hallar məhkəmələrdə işlərinin sayının azalmasına, hakimlərin daha ağır və mürəkkəb işlərə diqqət ayırması üçün şərait yaradır.
Məhz bu konstruktiv yanaşmaya və barışığın əldə olunmasında göstərdikləri əməkdaşlığa görə, hər iki vəkil Bakı 8 saylı Mediasiya Təşkilatının direktoru Mayıl Əhməd tərəfindən “TƏŞƏKKÜRNAMƏ” ilə təltif edilib. Sessiyanın sonunda vəkillərlə xatirə şəkli çəkilib.
Qanunvericiliyə uyğun olaraq, “Mediasiya haqqında” Azərbaycan Respublikası Qanununun 31-ci maddəsinə əsasən, hakimlərin fəaliyyətinin qiymətləndirilməsi zamanı mediasiyaya yönəldilmiş işlərin sayı mühüm göstəricilərdən biridir. Həmçinin “Məhkəmə-Hüquq Şurası haqqında” Qanunun 13-cü maddəsinə uyğun olaraq, mediasiyaya yönəldilmiş işlərin sayı uğurlu göstərici kimi hakimlərin qiymətləndirmədə nəzərə alınır. Bu çərçivədə, “Məhkəmə-Hüquq Şurası” tərəfindən təsdiq olunmuş “Hakimlərin Qiymətləndirilməsi Komitəsi haqqında Əsasnamə”nin 3.1.3-cü bəndində də mediasiyaya yönəldilən işlərin statistikası vacib qiymətləndirmə meyarı kimi göstərilib.
Bakı 8 saylı Mediasiya Təşkilatı ilə əlaqə üçün:
Ünvan: AZ 1033, Bakı şəhəri, Nizami rayonu, Heydər Əliyev prospekti 115,
ARENA PLAZA, Blok B, 11-ci mərtəbə, otaq 1105
Telefon: (+994) 051 401 87 07
