Yeni Azərbaycan Partiyası (YAP) Quba rayon təşkilatının təşəbbüsü ilə Qubada fəaliyyət göstərən müəssisə və təşkilatların fəalları üçün Qarabağa tur təşkil olunmuşdur. Tur çərçivəsində iştirakçılar Qarabağ torpağını ziyarət etdilər. Qarabağ alındıqdan sonra buranı ziyarət etmək bir başqa hissdir. Bu hissi sözlə ifadə etmək çətindir, çünki o, 30 illik həsrətin, göz yaşının, ümidin bir anda gerçəkləşməsidir. Uzun illərin həsrətinin bir gün bitəcəyi nağıl kimi gəlirdi, amma bu nağıl şəhidlərimizin qanı, qazilərimizin şücaəti sayəsində gerçəyə çevrildi. Qarabağda atılan hər addım qəlbimdə qürur və kövrəklik yaradır. Buradakı hər bir daş, hər bir məkan tariximizdir, sərvətimizdir. Şuşanın qala divarları, Cıdır düzünün əsrarəngiz mənzərəsi, Ağdam Cümə məscidinin minarələri bizə babalarımızın kim olduğunu pıçıldayır. Xankəndinin küçələrində gəzərkən anlayırsan ki, bu torpaq sadəcə coğrafiya deyil, millətin yaddaşıdır. İllərdir yuxularımızda gördüyümüz Xarıbülbül artıq azaddır, onun ətri doğma torpağın ətrinə qarışıb. Bu yerlər düşmən tapdağı altında inləyirdi, indi isə Azərbaycan bayrağı altında nəfəs alır. Bir fəal gənc kimi burada olmaqdan qürur duyuram. Çünki biz bu günü görmək üçün yaşayan, oxuyan, çalışan nəsilik. Bizə bu qüruru yaşadan isə Vətən uğrunda canından keçən oğullardır. Şəhid analarının əllərindən öpürəm. Onların göz yaşları ilə suvarılan bu torpaq artıq azaddır. Bizim borcumuz Qarabağı yenidən qurmaq, çiçəkləndirmək, gələcək nəsillərə əmanət etməkdir. Bu torpağa ayaq basanda başa düşürsən: Qarabağ sadəcə alınmadı, Qarabağ qayıtdı. O, yenidən bizim nəfəsimiz, səsimiz, ürək döyüntümüz oldu. Qarabağ, sənə qovuşmaq hər bir azərbaycanlının ən böyük xoşbəxtliyidir. Səni qorumaq isə bundan sonra bizim müqəddəs borcumuzdur.
Sonda YAP Quba rayon təşkilatının sədri xanım Fidan Hüseynovaya və kollektivinə göstərdikləri diqqət və qayğıya görə təşəkkürümü bildirirəm.
Fəal, ziyalı gənc – Abutalib Turabov.
