Qlobal qida təminatı, əsasən, üç vacib amildən asılıdır və hazırda onların hər birində ciddi çətinliklər müşahidə olunur.
Bu barədə “The New York Times” nəşri məlumat yayıb.
Kanadanın Quelf Universitetinin professoru Evan Freyzer nəşrə müsahibəsində bildirib ki, mövcud sistem üç əsas faktora əsaslanır: fasiləsiz ticarət, ucuz enerji və sabit iqlim:
“Hazırda elə bir vəziyyət yaranıb ki, sanki bu şərtlərin heç biri yerinə yetirilmir”.
Qəzet qeyd edir ki, kənd təsərrüfatı məhsullarının, xüsusilə də buğdanın daşındığı Qara və Qırmızı dənizlərin münaqişə zonasına çevrilməsi fasiləsiz ticarəti çətinləşdirir. Bundan əlavə, aqrar məhsulların yetişdirilməsində liderlərdən olan Avropada hökm sürən həddindən artıq istilər məhsuldarlığın aşağı düşməsinə gətirib çıxarır.
Digər tərəfdən, əsas buğda istehsalçılarından sayılan Avstraliya Hörmüz boğazının bağlanması səbəbindən gübrə qıtlığından əziyyət çəkir. Amerikalı fermerlər isə məhsuldarlığa mənfi təsir göstərən quraqlıq problemi ilə üzləşiblər.
Xatırladaq ki, BMT-nin Ərzaq və Kənd Təsərrüfatı Təşkilatı hələ may ayında Hörmüz boğazında yaranmış vəziyyətlə əlaqədar ciddi qlobal ərzaq böhranı təhlükəsi barədə xəbərdarlıq etmişdi.
