Artıq bir neçə ildir ki, Azərbaycanda Aliment Fondunun yaradılması ilə bağlı müzakirələr gedir. Azərbaycan Respublikasının İnsan hüquqları üzrə müvəkkilinin (Ombudsmanın) 2024-cü il üzrə məruzəsində bu məsələni gündəmə gətirməsi mövzunu yenidən aktuallaşdırıb. Bir neçə gün öncə Milli Məclisin İnsan hüquqları komitəsinin iclasında müzakirələr zamanı Aliment Fondu ilə bağlı fikir ayrılıqları yaşanıb. Belə ki, deputatlardan bəziləri bu təklifə qarşı çıxıb. Məsələn, deputat Zahid Oruc deyib ki, Aliment Fondunun yaradılması saxta boşanmaları artıra bilər. Həmkarı Razi Nurullayev isə bildirib ki, qadınlara stimul verən alimentdir. Onun fikrincə, bu gün boşanmaların artmasının səbəbi daha çox qadınların sərbəst qalmaq və aliment almaq imkanlarının olmasıdır.
Mövzu ilə bağlı danışan vəkil İsrafil Əlili qadınların məhz aliment almaq üçün boşanması barədə deyilənlərlə razı olmadığını bildirib.
“Bu fikirlə qətiyyən razı deyiləm. Düzdür, boşanmaların artmasında bəzi qadınların sərbəst qalma istəyi və ya aliment almaq imkanı ola bilər. Lakin vəkil kimi müşahidələrimə əsasən deyə bilərəm ki, bu çox aşağı faiz təşkil edir. Ona görə də biz boşanmaların məhz alimentə görə və ya qadınların sərbəst qalmaq istəyinə görə artdığını deyə bilmərik. Mən bunu sırf boşanma işləri üzrə ixtisaslaşmış və bu işlərdə çox iştirak etmiş vəkil kimi deyirəm”, – deyə o qeyd edib.
Lakin İ.Əlili də hesab edir ki, Aliment Fondunun yaradılması ilə saxta boşanmalar arta bilər.
“Formal olaraq bəzi ailələr məhkəmədə iddia qaldırıb boşana bilərlər və bununla Aliment Fondunun hesabına əlavə gəlir əldə etmə məqsədləri ola bilər. Yox, əgər həqiqətən saxta boşanmalar və ya sui-istifadə hallarının qarşısını almaq üçün bir mexanizm olacaqsa, bu zaman Aliment Fondunun yaradılmasının əleyhinə deyiləm. Bu fond alimentin ödənilməməsi nəticəsində uşaqların hüquqlarının pozulması hallarının qarşısını alacaq. Çünki nəticədə aliment uşaqların saxlanılması üçün təyin olunur və qanunvericilikdə də uşaqların mənafeyi digər şəxslərdən üstün tutulur”, – vəkil əlavə edib.
