Ukrayna generalı: Mi-24-lərin Belqoroda hücumu düşmənin arxasına keçə bildiyimizi göstərdi
2022-ci ilin aprelində Ukraynanın “Mi-24” helikopterlərinin Rusiyanın Belqorod şəhərinə həyata keçirdiyi “cəsarətli reyd” düşmənin arxasına keçərək onun ehtiyatlarını məhv edə bildiyimizi göstərdi.
“UNİAN”-ın məlumatına görə, bunu Ukrayna Silahlı Qüvvələri Quru Qoşunlarının ordu aviasiyasının komandanı, briqada generalı Pavel Bardakov LIGA.net-ə müsahibəsində deyib.
2022-ci ilin aprelində Belqorod yaxınlığında keçirilən əməliyyatla bağlı suala cavab verən general bunun “cəsarətli reyd” olduğunu bildirib.
“Bu, çox cəsarətli, çox igid bir əməliyyat idi. “Mi-24”-lərin bir neçə heyəti gecə saatlarında çənləri, anbarları aşkar etdi. Normal şəkildə işlədilər, düşməni qorxutdular. Bu, bizim düşmənin arxasına soxula və onun ehtiyatlarını məhv edə bildiyimizi göstərən bir təkan və yüksəliş oldu”, – Bardakov bildirib.
General əlavə edib ki, bu cür əməliyyat yalnız bir dəfə keçirilməyib.
Pilotların belə bir tapşırıq aldıqda nə dedikləri barədə suala cavab verən Bardakov onların sözlərini də açıqlayıb:
“Daha çox raket və daha çox sursat yükləyin – işləyəcəyik”.
“Bəlkə də müharibə başa çatdıqdan sonra əməliyyatlarımızın daha çoxunu açıqlayacağıq, daha böyük məsafələrdə daha da cəsarətli tapşırıqları yerinə yetirən qəhrəmanlarımız haqqında daha çox danışacağıq”, – briqada generalı deyib.
Qeyd edək ki, sözügedən əməliyyat keçirildiyi tarixdə Ukrayna tərəfi bu haqda rəsmi məlumat verməyib: sadəcə Belqoroda “naməlum” helikopterlərin hücum etdiyi bildirilib. Rusiya tərəfi isə hücumu Ukrayna ordusunun təşkil etdiyini etiraf edib…
