Konstitusiya Məhkəməsinin Plenumu Azərbaycan Respublikası Prokurorluğunun sorğusu əsasında cinayət-prosessual qanunvericiliyinin tətbiqi ilə bağlı qərar qəbul edib.
Bu barədə Konstitusiya Məhkəməsinin Mətbuat Xidmətindən məlumat verilib.
Bildirilib ki, Konstitusiya Məhkəməsinin sədri Fərhad Abdullayevin sədrliyi ilə keçirilən iclasda Azərbaycan Respublikası Konstitusiyasının 132-ci maddəsinin I hissəsi baxımından Cinayət-Prosessual Məcəllənin 420-ci maddəsinin həmin Məcəllənin 65.1, 142.1 və 397-ci maddələri ilə əlaqəli şəkildə şərh edilməsinə dair konstitusiya işinə baxılıb.
Plenum iş üzrə hakim Fərhad Tutayukun məruzəsini, Azərbaycan Respublikası Prokurorluğunun sorğusunu, Milli Məclis Aparatının mülahizəsini, Ali Məhkəmə, Bakı, Sumqayıt və Şirvan Apellyasiya məhkəmələrinin, Hüquqi Ekspertiza və Qanunvericilik Təşəbbüsləri Mərkəzinin, Vəkillər Kollegiyasının mütəxəssis rəylərini, həmçinin Bakı Dövlət Universitetinin Hüquq fakültəsinin Cinayət prosesi kafedrasının professoru, hüquq elmləri doktoru Məhəmməd Qəfərovun ekspert rəyini araşdıraraq qərar qəbul edib.
Qərara əsasən, apellyasiya instansiyası məhkəməsinin hökmü və ya qərarı qismən ləğv olunaraq iş yeni apellyasiya baxışına göndərildikdə, yeni baxış yalnız kassasiya instansiyası tərəfindən ləğv edilmiş hissə üzrə aparılmalıdır.
Bundan başqa, kassasiya instansiyasının qərarı ilə iş tam və ya qismən ləğv edildikdə yeni apellyasiya baxışı zamanı Cinayət-Prosessual Məcəlləsinin tələbləri ilə yanaşı, kassasiya instansiyasının qanunla müəyyənləşmiş hədlər daxilində verdiyi əsaslandırılmış göstərişlər də nəzərə alınmalıdır.
Plenum həmçinin qeyd edib ki, Cinayət-Prosessual Məcəllənin 397.5-ci maddəsinin tətbiq dairəsi yalnız əməlin hüquqi tövsifinə aid məsələlərlə məhdudlaşmır.
Qərarda hüquqi müəyyənlik, prosessual qənaət, səmərəlilik və ədalətli məhkəmə araşdırması prinsipləri nəzərə alınaraq, Cinayət-Prosessual Məcəllənin 410-cu maddəsində nəzərdə tutulan kassasiya şikayəti və kassasiya protestinin verilməsi müddətlərinin optimallaşdırılması istiqamətində qanunvericiliyin təkmilləşdirilməsi Milli Məclisə tövsiyə olunub.
Qeyd edilib ki, qərar dərc edildiyi gündən qüvvəyə minir, qətidir və heç bir orqan və ya şəxs tərəfindən ləğv edilə, dəyişdirilə və ya rəsmi təfsir oluna bilməz.
