Alimlər kainatın sonu ilə bağlı növbəti sarsıdıcı araşdırmanı təqdim ediblər. Tədqiqatçıların gəldiyi qənaətə görə, bəşəriyyətin və bütün qalaktikaların məhvinə düşündüyümüzdən daha az vaxt qalıb.
Tədqiqatçılar kainatın Böyük Partlayışdan 33,3 milyard il sonra tamamilə yox olacağını hesablayıblar. Hazırda kainatın yaşının təxminən 13,8 milyard il olduğunu nəzərə alsaq, bu, o deməkdir ki, “Qiyamət günü”nə cəmi 19,5 milyard il qalıb.
Alimlərin irəli sürdüyü ən real ssenari “Böyük Sıxılma” (“Big Crunch”) adlanır. Bu nəzəriyyəyə görə, kainatın hazırkı genişlənməsi vaxt keçdikcə dayanacaq və əks proseslə əvəz olunacaq. Nəticədə bütün ulduzlar, planetlər və qalaktikalar sürətlə bir-birinə yaxınlaşmağa başlayacaq və sonda vahid bir nöqtədə toplanaraq bir-birini əzəcək. Bu prosesdən sonra kosmik obyektlərin indiki formasından əsər-əlamət qalmayacaq.
Tədqiqatda həmçinin qeyd olunur ki, kainatın sonunda hər şeyin nəhəng qara dəliklərə çevrilməsi ehtimalı da çox yüksəkdir. Alimlər dünyamızın sonu üçün iki əsas variant görürlər: ya kainat sonsuzadək genişlənərək soyuyacaq və qaranlığa qərq olacaq, ya da “Böyük Sıxılma” nəticəsində hər şey vahid nöqtədə məhv olacaq.
