Xocalı faciəsi xalqımızın tarixində silinməz və ağrılı bir iz qoymuşdur. 1992-ci il fevralın 26-da baş vermiş Xocalı soyqırımı zamanı yüzlərlə günahsız insan amansızlıqla qətlə yetirilmişdir. Bu hadisə yalnız Azərbaycan xalqına deyil, bütün bəşəriyyətə qarşı törədilmiş ağır cinayət idi. O gecə körpələr, qadınlar, qocalar xüsusi qəddarlıqla öldürülmüş, ailələr isə məhv edilmişdir. Xocalı adı faciə və ağrı ilə yanaşı, eyni zamanda qəhrəmanlıq və dözüm rəmzinə çevrilmişdir. Bu hadisə xalqımızın yaddaşından heç vaxt silinməyəcək. Hər il fevral ayında şəhidlərimizin xatirəsi dərin ehtiramla yad olunur. Xocalı həqiqətlərinin dünya ictimaiyyətinə çatdırılması istiqamətində də mühüm işlər görülmüşdür. Xüsusilə Leyla Əliyevanın təşəbbüsü ilə başladılan “Xocalıya Ədalət” beynəlxalq kampaniyası bu həqiqətlərin tanıdılmasında böyük rol oynamışdır. Bu kampaniya sayəsində bir çox ölkələr Xocalı faciəsini tanımış və pisləmişdir.
Bu gün biz həm kədərli, həm də qürurluyuq. Çünki torpaqlarımız azad olunmuş, ərazi bütövlüyümüz bərpa edilmişdir. Şəhidlərimizin qanı yerdə qalmamışdır. Xocalı qurbanlarının ruhu qarşısında baş əyir və onların xatirəsini daim uca tuturuq. Azad edilmiş torpaqlarda üçrəngli bayrağımız qürurla dalğalanır. Xocalı faciəsi bizə birliyi, vətən sevgisini və mübarizə ruhunu öyrətdi. Bu hadisə göstərdi ki, xalqımız heç vaxt sınmayacaq və öz haqq səsini dünyaya çatdırmağı bacaracaq. Biz gələcək nəsillərə bu həqiqətləri ötürməli və tariximizi unutmamalıyıq. Xocalı yalnız bir faciə deyil, həm də milli yaddaşımızın və qürurumuzun bir parçasıdır. Hormətlə anırıq və heç vaxt unutmuruq!
Abutalib Turabov
(Fəal gənc ziyalı)
