2019-cu ildə qalmaqallı amerikalı maliyyəçi Ceffri Epşteynin ölüm gecəsi çəkilmiş müşahidə kamerası görüntülərini araşdıran müstəntiqlər onun kamerasının yaxınlığında narıncı rəngli bir fiqur müşahidə ediblər.
Bu barədə ABŞ Ədliyyə Nazirliyi tərəfindən dərc olunan Federal Təhqiqat Bürosunun videoanalizində qeyd olunur.
Videoyazıda aşağı mərtəbənin pilləkənləri ilə yuxarı doğru hərəkət edən narıncı rəngli parıltı əks olunub. Büronun məlumatına görə, bu, narıncı məhbus geyimində olan şəxslərdən biri ola bilərdi.
Yanvarın 30-da ABŞ Ədliyyə Nazirliyi Epşteynin dosyesindən son sənədlərin dərc edildiyini açıqlayıb. Nazir müavini Todd Blanş 3 milyondan çox sənəd səhifəsinin, həmçinin 2 mindən çox videoçarx və 180 min fotoşəkilin ictimaiyyətə açıqlandığını bildirib. Onun sözlərinə görə, bəzi foto və videolar ya Epşteynin özü, ya da onun ətrafı tərəfindən çəkilib.
Epşteyn 2002-2005-ci illər ərzində Nyu-Yorkdakı evinə və şəxsi adasına onlarla yetkinlik yaşına çatmayan qızın səfərlərini təşkil etməkdə ittiham olunurdu. Müstəntiqlər müəyyən ediblər ki, həmin qızlardan ən kiçiyinin 14 yaşı olub. 2019-cu ilin avqustunda maliyyəçi həbsxana kamerasında yarıhuşsuz vəziyyətdə tapılıb və onu xilas etmək mümkün olmayıb.
