“Yeni Azərbaycan Partiyasının çox parlaq gələcəyi var. Yeni Azərbaycan Partiyası daim yaşayacaqdır. Mən əminəm ki, Yeni Azərbaycan Partiyasına yeni-yeni gənc üzvlər gələcəklər, bu partiyanın prinsiplərini günü-gündən yüksəklərə qaldıracaqlar və Yeni Azərbaycan Partiyası Azərbaycanın gələcəyinə xidmət edəcəkdir”
Ümummilli Lider Heydər Əliyev
Azərbaycan müasir tarixinin ən şərəfli və qürurlu günlərini yaşayır. Ölkəmiz dünya şöhrətli dövlət xadimi Ulu Öndər Heydər Əliyev siyasət məktəbinin layiqli davamçısı möhtərəm Prezident İlham Əliyevin möhkəm iradəsi, qətiyyətli və məqsədyönlü fəaliyyəti, rəşadətli ordumuzun qəhrəmanlığı sayəsində son 30 ildə üzləşdiyimiz əzəli torpaqlarımızın işğalı faktını öz gücü ilə aradan qaldıraraq ərazi bütövlüyünü və suverenliyinin tam bərpa edib.
Bu tarixi dövrə baxış Azərbaycanın keçdiyi yolun ölkəmiz üçün necə də keşməkeşli, ağır sınaqlar dönəmi olduğunu deməyə əsas verir. Bu dövrdə üzləşdiyimiz çətinliklər, ictimai-siyasi proseslər və onların nəticələri ölkəmizin taleyində silinməz izlər buraxıb. Azərbaycan milli-azadlıq hərəkatının geniş dalğasında yenidən müstəqilliyinə qovuşub, müstəqil dövlət olmağın, sivil dünyada müstəqil dövlət kimi tanınmanın qürurunu yaşayıb. Ötən əsrin 80-ci illərinin sonlarından başlayaraq 90-cı illərin əvvəllərində davam edən torpaqlarımızın Ermənistan tərəfindən işğalı, eləcə də ölkədə baş qaldıran hakimiyyət boşluğu, siyasi xaos, o zamankı siyası qüvvələr arasında hakimiyyət və nüfuz davası, cılız siyasətbazların, antimilli qüvvələrin satqınlığı ölçüyəgəlməz səviyyəyə çatmışdı.
Məhz bu mərhələdə ölkəni siyasi xaosdan, özbaşınalıqdan, hakimiyyət boşluğundan xilas edəcək, Azərbaycanın inkişaf istiqamətini müəyyənləşdirəcək, milli maraqların fövqündə duracaq, Vətəni xilas edəcək yeni bir siyasi təşkilata və onu güclü dövlətçilik məharəti və təcrübəsi ilə idarə edəcək bir Liderə böyük ehtiyac yarandı.
Otuz üç il əvvəl, 1992-ci ilin 21 noyabrında tərəqqipərvər, milli düşüncəli ziyalılarımızın təşəbbüsü ilə Yeni Azərbaycan Partiyasının (YAP) yaradılması respublikamız üçün taleyüklü məsələlərin həlli baxımından çox əhəmiyyətli tarixi qərar idi. Ölkəmizin yeni tarix salnaməsinə müasir gəncliyin və gələcək nəsillərin Yeni Azərbaycan Partiyası kimi daxil olan YAP-ın təsis olunması, keçdiyi yol Azərbaycan tarixinin şanlı bir səhifəsidir.
Yeni Azərbaycan Partiyası siyasi səhnəyə necə gəldi?
Yeni partiyanın təşəkkülü Azərbaycanın olduqca mürəkkəb situasiyalardan, çətin imtahanlardan keçdiyi dövrə təsadüf edir. Azərbaycan dövlət müstəqilliyini yenicə qazanmışdı, lakin bu müstəqilliyə təhlükə və təhdid həm daxildən, həm də xaricdən artırdı. O zamankı hakimiyyətlərin ciddi səhvləri ucbatından daxildə siyasi gərginlik güclənmiş, ölkə faktiki parçalanmaq, vətəndaş qarşıdurması, müstəqilliyin itirilməsi təhlükəsi ilə üzləşmişdi. Respublikanı bürümüş dərin siyasi böhran uzun müddət dramatik şəkildə davam edə bilməzdi. Mürəkkəb şəraitdən çıxış yolu tapmaq və ölkəni xilas etmək lazım idi. Belə bir dövrdə məqsədyönlü və qətiyyətli siyasət yürüdən güclü liderə, ölkəni yaranmış durumdan xilas edəcək, respublikanı növbəti düşmən hücumlarından qoruyacaq, ayağa qaldıracaq dövlət başçısına ehtiyac hər gün, hər saat hiss olunurdu.
Nəhayət, Azərbaycanı siyasi diletantların idarəçiliyindən xilas etmək üçün ölkəmizin sağlam düşüncəli, tərəqqipərvər qüvvələri milli maraqlarımız düşüncəsi ilə öz səsini yüksəltdi: Azərbaycanı güclü siyasi partiya, güclü lider idarə etməlidir! Ziyalılar yeni bir siyasi partiyanın yaradılmasına, xalqın güclü liderinin ona rəhbərlik etməsinə ehtiyac olduğunu bəyan etdilər. Bu lider Naxçıvanda yaşayan, çalışan, vaxtilə Azərbaycana rəhbərlik etmiş, Sovet İttifaqında rəhbər vəzifələrdən birini tutmuş Heydər Əliyev idi. Beləliklə, Azərbaycanın taleyi üçün vacib olan bu proses “91-lər”in müraciəti ilə başladı.
91 ziyalı görkəmli siyasi xadim Heydər Əliyevə müraciət ünvanlamaqla, Azərbaycanı təhlükələrdən qurtaracaq, ölkəni inkişafa aparacaq prosesin təməlini qoydu. Bu təməldə Yeni Azərbaycan Partiyasını təsis etmək, onun rəhbərliyinə Heydər Əliyevi gətirmək arzu və planları dayanırdı. Çünki Heydər Əliyev dünya miqyasında tanınan şəxsiyyət idi. Çətin situasiyalarda düzgün addımlar atmağı, rasional qərarlar verməyi bacaran bir şəxsiyyət idi. Ziyalıların təşəbbüsləri həyata keçdi və Yeni Azərbaycan Partiyası siyasi səhnəyə beləcə qədəm qoydu. Ulu Öndərə müraciət edən məşhur “91-lər”in çox cəsarətli addımları nəticəsində Azərbaycanda dağıdıcı proseslərin qarşısı alındı.
1992-ci il noyabrın 21-də Ulu Öndər Heydər Əliyevin rəhbərliyi və sədrliyi ilə Naxçıvanda YAP-ın təsis konfransının keçirilməsi müstəqil Azərbaycan dövlətinin tarixində böyük və əsaslı dönüş nöqtəsinə çevrilib. 550 nəfərdən ibarət təşəbbüs qrupu Naxçıvana gedərək partiyanın təsis konfransını orada keçirməyə nail olub. Təsis konfransı Yeni Azərbaycan Partiyasının yaradılması haqqında qərar verib, Heydər Əliyev partiyanın Sədri seçilib. Müstəqil Azərbaycanın tarixində öz üzərinə böyük tarixi missiya götürən Yeni Azərbaycan Partiyasının təşəkkülü belə baş verib. Bununla da Azərbaycanın gələcəyinin təhlükə qarşısında qaldığı, dövlətimizin taleyinin həll olunduğu bir dövrdə yaranan Yeni Azərbaycan Partiyası milli dövlətçiliyimizin inkişafı üçün son dərəcə əhəmiyyətli olan yeni tarixi mərhələnin əsasını qoyub.
Sonralar Yeni Azərbaycan Partiyasının 10 illik yubiley mərasimində çıxış edən Ulu Öndər bu dövrü xüsusi həssaslıqla xatırlayırdı: “1992-ci il noyabrın 21-də Naxçıvanda təsis konfransında iştirak edənlərin hamısı həqiqətən vətənpərvər olublar, uzaqgörən olublar, Azərbaycanın aqibəti haqqında düşünüblər, millət, Vətən, xalq haqqında düşünüblər. İndi biz xoşbəxtik ki, on il bundan qabaq yaratdığımız kiçik bir partiya böyüyüb, şaxələnib, bütün Azərbaycanı əhatə edib və sıralarında 280 min üzvü cəmləyibdir. Hələ nə qədər də tərəfdaşları, pərəstişkarları var. Beləliklə, on ildə bizim partiyamız, Yeni Azərbaycan Partiyası kiçik bir partiyadan, çətin şəraitdə doğulan bir partiyadan böyük siyasi partiyaya çevrilib və indi Azərbaycanın aparıcı siyasi qüvvəsidir”.
Prezident İlham Əliyev 2022-ci il noyabrın 21-də Yeni Azərbaycan Partiyasının yaradılmasının 30 illiyi münasibətilə keçirilən tədbirdəkı çıxışında bu dövrü belə dəyərləndirirdi: “Partiyamızın yaranması tarixi hadisə idi. O vaxt gənc Azərbaycan Respublikası çətin günlər yaşayırdı. Müstəqilliyimizin cəmi bir yaşı var idi və müstəqilliyimizin birinci ili çox ağır keçmişdir, bəzi hallarda xalqımız böyük faciələrlə üzləşmişdir. Belə bir vəziyyətdə Azərbaycanın görkəmli nümayəndələri, vətənpərvər insanlar, ölkənin gələcəyini düşünən insanlar ölkəmizin nicat yolunu Heydər Əliyevin simasında görürdülər və məhz buna görə Ulu Öndərə müraciət ünvanlamışdılar. Bu müraciəti ünvanlayan məşhur “91-lər” öz tarixi missiyalarını şərəflə yerinə yetirdilər”.
Prezident İlham Əliyev YAP-ın 30 illik yubiley tədbirində həmin tarixi qərara çox yüksək qiymət verib: “Bu gün Yeni Azərbaycan Partiyasının yubileyini qeyd edərkən hər birimiz, şübhəsiz, hər birimiz yenə də Ulu Öndərin xatirəsinə ehtiramımızı ifadə edirik. Çünki illər keçdikcə və dünya dəyişdikcə hər birimiz çox gözəl bilirik ki, əgər o vaxt Azərbaycan xalqı Heydər Əliyevə müraciət edib onu hakimiyyətə dəvət etməsəydi, ölkəmiz daha böyük fəlakətlə üzləşə bilərdi”.
Yeni Azərbaycan Partiyası demokratik prinsiplər və ideyalara sadiq qalan bir partiyadır. Konstitusiya və qanunvericilik çərçivəsində, özünün Nizamnaməsi və Proqramı əsasında fəaliyyət göstərən, öz sıralarında Azərbaycanda hüquqi dövlət, sabit və sosialyönümlü iqtisadiyyat, vətəndaş cəmiyyəti qurmaq ideyalarını qəbul edən vətəndaşları birləşdirən siyasi partiyadır.
Partiyanın Proqramında irəli sürülmüş əsas vəzifələr dövlət müstəqilliyinin möhkəmləndirilməsi, demokratik, hüquqi, dünyəvi dövlətin qurulması, vətəndaşların dinc və firavan həyatının təmin edilməsi idi. Bunlar qısa müddətdə yerinə yetirildi, ən başlıcası Azərbaycan müstəqilliyini möhkəmlətdi, ölkəmiz Avropaya inteqrasiya etdi, regionun güclü dövlətinə çevrildi.
Qeyd edək ki, Heydər Əliyevin müstəqilliyin ilk illərində dövlət müstəqilliyinin möhkəmləndirilməsi konsepsiyasında cəmiyyət həyatının bütün sahələrində dərin konseptual dəyişikliklərin həyata keçirilməsi aparıcı xətt təşkil edirdi. Yeni Azərbaycan Partiyasının fəaliyyət konsepsiyasında xüsusən də tarixi ərazilərimizin düşmən işğalından azad olunması, ərazilərimizin suverenliyinin qorunması hədəfi aydın əksini tapırdı.
Heydər Əliyev hələ 1992-ci ilin oktyabrında “91-lər”in müraciətinə cavab olaraq göndərdiyi cavab məktubunda bu hədəfə nail olmağın yollarını göstərir və bu yolda qarşıda duran əsas vəzifələrdən biri kimi Ermənistanın ölkəmizə qarşı ədalətsiz müharibəsinin nəticələrinin aradan qaldırılmasını vacib hesab edirdi.
Ulu Öndərin məktubuna diqqət yetirək: “Azərbaycanın müharibə vəziyyətindən çıxması və Qarabağ probleminin tezliklə həll olunması. Artıq beş ildir ki, Azərbaycanla Ermənistan arasında müharibə gedir, ərazimizin bir hissəsini itirmişik. Ermənistanla həmsərhəd bölgələrin bir çox yaşayış məntəqələri dağılmış, minlərlə insan həlak olmuş, yaralanmış, şikəst və əlil olmuşlar. Respublikada yüz minlərlə yurdlarından didərgin düşmüş ağır vəziyyətdə yaşayan qaçqınlar var. Respublikaya misli görünməmiş hədsiz maddi və mənəvi ziyan dəyib. Ən dəhşətlisi budur ki, bütün bu faciələrin hələ də sonu görünmür. Bir il bundan əvvəl olduğu kimi, bu gün də Azərbaycanın rəhbər dövlət orqanlarının Qarabağ problemi haqqında dəqiq, aydın konsepsiyası və lazımi hərbi-siyasi strategiyası yoxdur. Belə təsəvvür yaranır ki, Qarabağda və başqa sərhəd zonalarında hərbi əməliyyatlar özbaşına gedir”.
Bu baxımdan dahi lider qeyd edirdi ki, bu problemin ən qısa müddətdə həlli müstəqil Azərbaycan dövləti üçün son dərəcə vacibdir: “Azərbaycanın çağdaş və gələcək taleyi ilə bağlı bu problemlərə biganə qalmağa heç kəsin haqqı yoxdur”.
Beləliklə də, Ümummilli Liderin xilaskarlıq missiyası nəticəsində Azərbaycanın dövlət müstəqilliyini təhdid edən proseslərin qarşısı qətiyyətlə alındı, Ermənistanla atəşkəsə nail olundu, ölkədə ictimai-siyasi sabitlik bərqərar edildi, liberal iqtisadiyyatın formalaşdırılmasına, yeni neft strategiyasının reallaşdırılmasına başlanıldı.
“Dünənin, bu günün və sabahın partiyası”
Ulu Öndər Heydər Əliyevin xalqın təkidli çağırışı ilə yenidən hakimiyyətə qayıdışı onun xilaskarlıq missiyasının davamı demək idi. Bu, həm də onun rəhbərlik etdiyi Yeni Azərbaycan Partiyasının siyasi hakimiyyətə gəlişi və cəmiyyətin aparıcı qüvvəsinə – iqtidar partiyasına çevrilməsinə zəmin yaratmış oldu.
Partiyanın ilk addımları Azərbaycanda siyasi sabitliyin bərpasına yönəldildi. Təsadüfi deyildir ki, 1993-cü ilin yayında Azərbaycanda vətəndaş müharibəsi başlanan dövrdə xalqımızın bütün ümidləri yenə də Heydər Əliyevin dühası ilə bağlı idi. Xalqın tələbi ilə hakimiyyətə gələn Ulu Öndər qısa müddət ərzində vəziyyəti sabitləşdirdi və bu, imkan verdi ki, ölkəmiz inkişaf yoluna qədəm qoysun.
Ümummilli Lider Yeni Azərbaycan Partiyasını qısa zamanda inkişaf etdirdi, özünün dediyi kimi, “dünənin, bu günün və sabahın partiyası” səviyyəsinə yüksəltdi. Yeni Azərbaycan Partiyası yarandığı gündən irəli sürdüyü təşəbbüsləri, qəbul etdiyi qərarları, müəyyənləşdirdiyi hədəfləri ilə Azərbaycanın daha da qüdrətlənməsinə, beynəlxalq nüfuzunun artmasına töhfələr verdi.
Ulu Öndər Heydər Əliyevin yaratdığı partiya ötən illər ərzində siyasi sabitliyin və davamlı inkişafın təminatçısı kimi çıxış etdi. Qısa müddət ərzində ümumxalq partiyasına çevrilmiş Yeni Azərbaycan Partiyası yarandıqdan bu günə qədər çox böyük, şərəfli, uğurlu yol keçib və keçməkdə davam edir.
Müasir dövrün yeniləşən partiyası
Yeni Azərbaycan Partiyası bu gün demokratik prinsiplər və ideyalara sadiq qalan bir partiya kimi öz fəaliyyətini uğurla davam etdirir. Partiyanın 2021-ci ildə keçirillən VII qurultayından sonra təşkilatın sıraları genişlənib. Bu tendensiya hakim partiyanın fəaliyyətinə cəmiyyətin müsbət yanaşması və onun gələcəyinə bəslənən pozitiv düşüncələrlə bağlıdır. VII Qurultayda təsdiq olunan yeni Proqramla “Müzəffər liderlə Azərbaycanı yeni zirvələrə aparan güclü partiya” olmaq vəzifəsi qarşıya qoyuldu və 10 strateji istiqamət seçildi: Heydər Əliyev yolu, Müstəqillik, Azərbaycançılıq, Dövlətçilik, Qanunun aliliyi, Varislik və təkamül, Konstruktiv əməkdaşlıq və dialoq, Sosial ədalət və insan amili, Multikultural cəmiyyət, Demokratik ənənələrin inkişafı.
Vətən müharibəsində əldə olunmuş Böyük Zəfər ölkəmizdə bir sıra partiyaların YAP ətrafında birləşməsi ilə nəticələnib. Hakim partiyanın VII qurultayında 6 siyasi partiya təşəbbüs göstərərək YAP-a qoşulmaq barədə qərar verdiklərini açıqlayıblar ki, bu da Azərbaycanda milli birliyin, həmrəyliyin artmasına, Yeni Azərbaycan Partiyasının siyasi mövqeyinin daha da güclənməsinə xidmət edən uğurlu bir addım kimi qiymətləndirilir.
Böyük Zəfərdən sonra Azərbaycanın beynəlxalq müstəvidə fəal mövqe nümayiş etdirməsi və qlobal təşəbbüslərə imza atması ölkəmizə çox sayda tərəfdaş qazandırıb. Bu kontekstdə YAP hakim partiya olaraq öz siyasətini adekvat olaraq qurub və qurmaqdadır.
Hazırda hakim partiyanın fəaliyyəti ölkə qarşısında duran strateji hədəflərin təmin olunmasına yönəlib. YAP-ın fəaliyyət konsepsiyasına uyğun olaraq ölkənin müstəqilliyi qorunur, demokratik ənənələr inkişaf etdirilir, güclü iqtisadiyyat yolunda davamlı fəaliyyət ortaya qoyulur, qüdrətli ordu quruculuğu davam etdirlir, Qarabağ və Şərqi Zəngəzura Böyük Qayıdış istiqamətində nəhəng işlər həyata keçirilir.
Azərbaycanı yeni zirvələrə aparan güclü partiya
Yeni Azərbaycan Partiyasının 33 illik yubileyi böyük qürur və sevinc hissləri ilə qeyd olunur. Bu tarix təkcə bir siyasi təşkilat üçün deyil, bütövlükdə xalqımız, dövlətimiz üçün mühüm əhəmiyyət kəsb edən və Azərbaycanın şərəfli tarixinə qızıl hərflərlə yazılan əlamətdar bir tarixdir. Əsası Ümummilli Liderimiz Heydər Əliyev tərəfindən qoyulan hakim partiyanın ötən dövr ərzində keçdiyi yola nəzər salsaq, onun həm milli-tarixi ənənələrimizə sadiqliyinin, eyni zamanda müstəqilliyin qorunması, möhkəmlənməsi və ərazi bütövlüyünün təmin olunması kimi başlıca məqsəd və vəzifələri böyük məsuliyyətlə, layiqincə yerinə yetirdiyinin şahidi olarıq.
YAP dahi şəxsiyyətin layiqli davamçısı Prezident İlham Əliyevin apardığı siyasətlə inkişafın yeni dönəmini yaşayır. Yeni Azərbaycan Partiyasının Sədri İlham Əliyevin rəhbərliyi ilə partiya nəinki ölkəmizin, hətta regionun aparıcı siyasi qüvvəsinə çevrilib. Hazırda dünyanın ən sabit və dinamik inkişaf edən dövlətləri ilə bir sırada yer alan Azərbaycanın qazandığı parlaq uğurlarda xalqımızın milli maraqlarını ifadə edən vahid və aparıcı siyasi qüvvəyə çevrilən YAP-ın mühüm rolu var.
30 ilə yaxın işğal altında qalan torpaqlarımızın 2020-ci il sentyabrın 27-dən başlayan 44 günlük Vətən müharibəsində azad edilməsi, düşmən üzərində böyük tarixi Qələbənın qazanılması bir tərəfdən ümumi rifahın, tərəqqinin və inkişafın məntiqi yekunudursa, digər tərəfdən Prezident İlham Əliyevin müstəsna hərbi-siyasi məharətinin və çoxşaxəli dövlətçilik fəaliyyətinin ən parlaq nümunəsidir.
Dahi şəxsiyyət Heydər Əliyevin uzaqgörən və məqsədyönlü siyasəti nəticəsində müstəqil dövlət quruculuğunda əldə olunan uğurlar, Azərbaycanın dünya birliyində mövqeyinin möhkəmlənməsi Yeni Azərbaycan Partiyasının da xalq arasındakı nüfuzunu getdikcə artırıb.
YAP – Zəfər partiyası
Ötən 33 il müddətində hakim partiya şərəfli və məsuliyyətli yol qət edib. Ulu Öndərin siyasi kursuna hər zaman sadiq qalan YAP-ın Sədri, Prezident İlham Əliyev əzmlə, yorulmadan dövlətin, xalqın mənafeyi naminə Heydər Əliyev ideyalarını uğurla həyata keçirməkdədir.
Partiya öz sıralarında və ətrafında cəmiyyətin bütün təbəqələrini, o cümlədən görkəmli simaları, ziyalıları, gəncləri ümumi amal və ideyalar uğrunda sıx birləşdirib və Ümummilli Liderin parlaq ideyalarının daşıyıcısı kimi cəmiyyətdə öz aparıcı rolunu daim möhkəmləndirməkdədir.
33 illik yubileyin arxasında böyük siyasi tarix dayanır. Bir qərinəlik şərəfli yol keçən YAP bu gün artıq siyasi sistemin əsas sütununa çevrilib, cəmiyyətimizdə müasir ideologiya və dəyərlər formalaşdırıb. Ulu Öndərin yaratdığı partiya daim öz fəaliyyətində azərbaycançılıq ideologiyasını, mili maraqların təmin edilməsini rəhbər tutur. Azərbaycanın dövlət quruculuğu prosesində müstəsna xidmətləri olan, ölkəmizin müstəqilliyinə böyük töhfələr verən, onun qorunmasına xidmət edən və milli gücü səfərbər edərək, dövlət maraqlarımızın qorunmasına yönləndirən böyük siyasi təşkilat olan YAP eyni zamanda qələbələr partiyasıdır.
Çox mürəkkəb siyası şəraitdə meydana gələn YAP ilk gündən indiyə qədər tutduğu mövqeyinə və siyasi kursuna sadiq qalıb. YAP-ın fəaliyyəti dövründə aparılan davamlı və uğurlu islahatlar müasir və müstəqil Azərbaycanın qurulmasına, inkişafına xidmət edib.
Beləliklə, Ümummilli Lider Heydər Əliyevin qurucusu olduğu Yeni Azərbaycan Partiyası xalqımızın və ölkəmizin həyatına fundamental dəyişikliklər gətirib. Yeni Azərbaycan Partiyası dövlətçiliyin əsaslarının qurulması, möhkəm təməl üzərində inkişafında misilsiz xidmətlər göstərmiş Ümummilli Liderin uzunillik dövlət idarəetmə təcrübəsi və uzaqgörənliyi sayəsində ölkədə ən böyük, güclü və effektiv siyasi qüvvəyə çevrilib.
Aytən Qurbanova
YAP Yasamal rayon “H.B.Zərdabi pr.61” (19 saylı Şəhər Poliklinikası) ünvanı üzrə ərazi partiya təşkilatının sədri, 19 saylı Şəhər Poliklinikasının baş həkimi
