Bu il Azərbaycan xalqı üçün tarixi, qürurverici bir hadisənin, 44 günlük Vətən müharibəsində Qələbənin 5 illiyini qeyd edir. 2020-ci il 27 sentyabrda başlanan və 44 gün davam edən mübarizə, Azərbaycan tarixində dönüş nöqtəsi olmaqla, xalqın və dövlətin birliyinin, cənab Prezident İlham Əliyevin müdrik rəhbərliyinin və ordumuzun şücaətinin nəticəsində böyük Zəfərlə başa çatdı. Cənab Prezident, Müzəffər Ali Baş Komandan İlham Əliyevin rəhbərliyi ilə Azərbaycan dövləti müharibədən əvvəlki illərdə həm siyasi, həm iqtisadi, həm də hərbi sahədə sistemli və məqsədyönlü siyasət yürüdərək, gələcək Zəfərin təməlini yaratmışdı. 2003-cü ildən etibarən cənab Prezident İlham Əliyevin rəhbərliyi ilə ordu quruculuğu prioritet istiqamətə çevrildi, hərbi güc və müdafiə potensialı yüksəldi, müasir silahlarla təchizat təmin edildi. 44 günlük Vətən müharibəsi zamanı cənab Prezident İlham Əliyev həm cəbhədə qazanılan hərbi uğurların siyasi müstəvidə təsdiqlənməsini təmin etdi, həm də diplomatik meydanda Azərbaycanın mövqelərini möhkəmləndirdi. Dövlət başçısının hər bir çıxışı, beynəlxalq mediaya verdiyi müsahibələr və xalqa müraciətləri müharibənin informasiya cəbhəsində parlaq bir qələbə idi. Ermənistanın Kapitulyasiyası, Tarixi Ədalətin Bərpası oldu 2020-ci il 10 noyabr tarixində Ermənistanın kapitulyasiya sənədinə imza atması, cənab Prezident İlham Əliyevin siyasi və strateji zəfərinin məntiqi nəticəsi oldu. Bu sənəd 30 ilə yaxın davam edən işğalın sonunu, BMT qətnamələrinin icrasını və Azərbaycanın ərazi bütövlüyünün bərpasını təmin etdi. Bu tarixi hadisə, təkcə hərbi deyil, həm də siyasi və mənəvi qələbə idi. Azərbaycanın haqq səsinin beynəlxalq səviyyədə tanınması və ədalətin bərpası kimi qiymətləndirilir. Zəfər tariximizin ən müqəddəs səhifəsi şəhidlərimizin qanı ilə yazılıb. Azərbaycan Ordusunun minlərlə qəhrəman oğlu Vətən torpaqları uğrunda canından keçdi, yüzlərlə qazimiz bədəninin bir hissəsini, lakin ruhunun bütövlüyünü qoruyaraq bu qələbənin memarına çevrildi. Bu gün onların hər biri xalqın yaddaşında əbədi qəhrəmanlıq simvolu kimi yaşayır. Cənab Prezident İlham Əliyevin və Birinci vitse-prezident Mehriban xanım Əliyevanın şəhid ailələrinə və qazilərə göstərdiyi diqqət və qayğı, dövlətimizin mənəvi borcuna sadiqliyinin təcəssümüdür. 44 günlük müharibə Azərbaycanın milli birliyini və vətənpərvərlik ruhunu misilsiz dərəcədə nümayiş etdirdi. Xalq Ali Baş Komandanın ətrafında sıx birləşdi, hər bir azərbaycanlı ön cəbhədə döyüşən əsgərlə eyni səngərdə dayandı. Siyasi partiyalardan tutmuş sadə vətəndaşlara qədər hamı bir amal uğrunda, Vətən uğrunda birləşdi. Bu birliyin gücü, cənab Prezident İlham Əliyevin dəfələrlə vurğuladığı kimi, Azərbaycanın ən böyük sərvətidir. Məhz bu həmrəylik ölkəmizi Qələbəyə, sonra isə bərpa və quruculuq mərhələsində yeni yüksəlişə gətirib çıxardı. Bu gün Zəfər tarixinin 5-ci ilində Azərbaycan yalnız keçmişin qürurunu yaşamır, həm də gələcəyin parlaq səhifəsini yazır. Qarabağ və Şərqi Zəngəzurda aparılan bərpa və quruculuq işləri dövlətin gücünü, cənab Prezident İlham Əliyevin strateji uzaqgörənliyini nümayiş etdirir. Ağıllı kəndlər, müasir şəhərlər, beynəlxalq hava limanları və infrastruktur layihələri artıq reallığa çevrilib. Keçmiş məcburi köçkünlərin doğma yurdlarına qayıdışı, Böyük Qayıdış proqramı, Zəfərin davamı və dövlət siyasətinin humanist mahiyyətidir. Zəfərin 5 illiyi təkcə hərbi qələbənin ildönümü deyil, həm də müstəqil dövlətimizin qüdrətinin, xalqımızın birliyinin və liderimizin qətiyyətli iradəsinin təntənəsidir. Cənab Prezident İlham Əliyevin müdrik rəhbərliyi altında Azərbaycan bu gün regionda sülhün və inkişafın əsas təminatçısı kimi çıxış edir. Bu Qələbə bir daha sübut etdi ki, Azərbaycan xalqı üçün azadlıq, müstəqillik və torpaq sevgisi əbədidir. Şəhidlərimizin ruhu qarşısında baş əyir, qazilərimizə dərin ehtiramımızı bildiririk. Qəhrəmanlıqla yazılmış bu tarix gələcək nəsillərə Qarabağ Azərbaycandır! sözlərini əbədi inamla səsləndirmək gücü verir.
Nicat İsmayılov
YAP Yasamal rayon təşkilatının fəal üzvü
