Artıq 5 ildir ki, 25 oktyabr – Qubadlının azad edildiyi gün qürur və fəxarətlə qeyd olunur. Müzəffər Ali Baş Komandan cənab İlham Əliyevin rəhbərliyi ilə Azərbaycan Ordusu Qubadlını işğaldan azad etdi. Bu tarix təkcə bir şəhərin işğaldan azad edilməsi deyil, həm də xalqın iradəsinin, dövlətin qüdrətinin və ədalətin bərpasının rəmzidir.
Qədim yaşayış məskənlərindən biri olan Qubadlı tarix boyu Qarabağ və Zəngəzur bölgələrinin mədəni, iqtisadi və mənəvi körpüsü kimi tanınıb. Qubadlı həmçinin Azərbaycan folklor xəritəsinin mühüm bir parçasıdır. Füsunkar təbiəti bu bölgəni Azərbaycanın “yaşıl incisi”nə çevirib. Həkəri çayı, Bərgüşad çayı, Mişni və Sofulu meşələri, Daşbaşı yaylası, Topağac və Muradxanlı bulaqları bu torpaqda yerləşir.
1993-cü il tarixində Qubadlının işğal olunması ilə xalq böyük bir faciə yaşadı. İşğal dönəmində burada evlər, mədəniyyət abidələri tamamilə dağıdıldı. İllər sonra 27 sentyabr 2020-ci il tarixində başlayan Vətən müharibəsi Azərbaycanın tarix ədaləti bərpa etməsinin başlanğıcı oldu. Müzəffər Ali Baş Komandanın rəhbərliyi ilə ordumuz cəbhə boyu qəhrəmanlıq göstərərək torpaqlarımızı addım-addım azad etdi. Nəhayət, 25 oktyabr 2020-ci il tarixində cənab Prezident İlham Əliyev xalqa müraciət edərək söylədi: “Bu gün Qubadlı şəhəri və Qubadlı rayonunun bir çox kəndləri azad edildi. Qubadlı bizimdir! Qarabağ Azərbaycandır!” Qubadlının azadlığı Azərbaycan xalqının 27 illik nisgilinə son qoydu.
Qubadlı işğaldan azad edildikdən sonra böyük quruculuq işləri başlanıldı. Ölkə başçısı cənab İlham Əliyev və birinci vitse-prezident Mheriban xanım Əliyeva Qubadlıya dəfələrlə səfər edərək şəhərin bərpa planını təsdiqlədilər. Qubadlı şəhərinin baş planı 2040-cı ilə qədər olan inkişaf strategiyasının müəyyən edir. Bu plan üzrə yeni yaşayış massivləri salınır; məktəblər, bağçalar, xəstəxanalar tikilir; su, qaz, elektrik və optik rabitə xətləri bərpa olunur; “ağıllı kənd” və “yaşıl enerji” layihələri reallaşdırılır.
2023-cü il tarixində Qubadlıya ilk köç karvanı yola salındı. 30 ildən sonra insanlar doğma yurdlarına geri döndülər. Artıq Qubadlı ölkənin dayanıqlı inkişaf və müasir şəhərsalma siyasətinin nümunəsinə çevrilib. Burada bərpaolunan enerji layihələri, ekoturizm marşrutları, rəqəmsal idarəetmə infrastrukturu yaradılır. Qubadlını təkcə əvvəlki kimi deyil, eyni zamanda daha müasir, daha yaşıl və daha güclü şəkildə bərpa etməkdir.
Qubadlının azadlığı uğrunda yüzlərlə igid oğullarımız canını fəda etdi. Şəhərin girişində Zəfər kompleksi və Şəhidlər memorialı qəhrəmanların əziz xatirəsini əbədiləşdirəcək. Qubadlı tarixdir, yaddaşdır və gələcəyə ünvanlanmış mesajdır. Bu şəhər xalqın dözümünü, iradəsini və birliyini təcəssüm etdirir. Tarix bir daha sübut edir ki, Azərbaycan xalqı azadlıq uğrunda birləşdikdə qarşısında heç bir qüvvə dayana bilməz. Qubadlıya baxarkən təkcə dağların, meşələrin və çayların deyil, xalqın yenilməz ruhunu görürük.
Qubadlı – qəhrəmanlıqla azad edilən, qürurla dirçələn, əbədi yaşayan şəhərdir!
Nigar Abdullayeva
YAP Yasamal rayonu AMEA Folklor İnstitutu üzrə ərazi partiya təşkilatının sədr müavini
