2025-ci il – Konstitusiya və Suverenlik ili çərçivəsində 7-15 oktyabr tarixlərində Soyqırımı Memorial Kompleksinin təşəbbüsü və Quba Regional Meşə Təsərrüfatı Mərkəzinin dəstəyi ilə genişmiqyaslı ağacəkmə kampaniyası keçirilib. Kompleksin mətbuat katibi Abutalib Turabovun verdiyi məlumata görə “Bir ağac – min nəfəs” şüarı altında keçirilən kampaniya bölgənin yaşıllaşdırılması və ekoloji tarazlığın bərpasını hədəfləyir. Aksiyada Qubadakı müxtəlif qurumlar – Quba-Xaçmaz Regional Gənclər və İdman İdarəsi, Çıraqqala–Şabran Dövlət Tarix-Mədəniyyət Qoruğu, Xucbala İƏV, Xucbala bələdiyyəsi, Quba İş Adamlarına Dəstək-QİAD təşkilatının rəsmiləri, regionun fəalları, həmçinin Azərbaycan Dövlət Pedaqoji Universitetinin Quba filialının, Özbəkistan Respublikasının Məktəbəqədər və Məktəb Təhsil Nazirliyinin tabeliyindəki Pedaqoji bacarıqlar mərkəzlərinin rəhbər və əməkdaşları da iştirak edib. Ağacəkmə kampaniyası çərçivəsində 600-dən çox ağac əkilib. Qeyd edək ki, təşkil olunan layihə həm təbiətin mühafizəsinə töhfə verir, həm də cəmiyyətin ekoloji məsuliyyətinin artırılmasına xidmət edir. Belə təşəbbüslər regionda ekoloji düşüncənin formalaşmasına və ictimai fəallığın artmasına mühüm təsir göstərir.
