Bildiyimiz kimi, Milli Mətbuatımızın əsası 1875-ci il iyulun 22-də Həsən bəy Zərdabinin təsis etdiyi “Əkinçi” qəzeti ilə qoyulub. Bu tarix milli jurnalistikanın doğum günü kimi qeyd olunur və hər il ölkəmizdə “Milli Mətbuat Günü” kimi qeyd edilir. Bu gün, həm də mətbuat sahəsində çalışan peşəkar insanların əməyinə verilən dəyərin göstəricisidir.
Bu günümüzdə mətbuatın inkişafında xidmətləri olan və ictimaiyyətlə əlaqələrin qurulmasında fəal rola malik şəxslərdən biri də medianın dostu kimi tanınan Abutalib Turabovdur.
Hal-hazırda Quba Soyqırımı Memorial Kompleksində mətbuat katibi kimi fəaliyyət göstərən Abutalib Turabov, mədəniyyət və tarix yönümlü maarifləndirmə işlərində medianın rolunu önə çıxaran simalardandır.
Onun mətbuata olan marağı və bağlılığı hələ illər öncə – televiziya sahəsində çalışdığı dövrdən formalaşıb. Həyatının bir mərhələsində televiziya aparıcısı kimi fəaliyyət göstərməsi, bu sahəyə olan marağının təməlini qoyub. Bu təcrübə ona həm kommunikasiya, həm də ictimaiyyətlə səmərəli əlaqə qurmaq bacarığı qazandırıb.
Hazırda o, kompleksin fəaliyyəti, tarixi həqiqətlərin təbliği və beynəlxalq aləmdə tanıdılması istiqamətində aparılan işlərdə mətbuat vasitəsilə mühüm rol oynayır. Peşəkar yanaşması, operativliyi və səliqəli təqdimat tərzi ilə hər kəsin rəğbətini qazanıb. Abutalib Turabovun fəaliyyəti bir daha göstərir ki, mətbuat sadəcə informasiya vasitəsi deyil, həm də cəmiyyətə xidmət edən, tarixi yaddaşı yaşadan önəmli sahədir.
Əlamətdar gün münasibətilə bu sahədə fəaliyyət göstərən bütün əməkdaşları ürəkdən təbrik edir, işlərində uğurlar arzulayırıq.
