Azərbaycan Respublikasının İnsan Hüquqları üzrə Müvəkkilinin (Ombudsmanın) təşəbbüsü ilə Bakı şəhərində “Konstitusiya və Suverenlik İli” və 18 İyun – Azərbaycan Respublikasında İnsan Hüquqları Gününə həsr olunmuş “Qanunun aliliyinin gücləndirilməsi: ombudsmanların və milli insan hüquqları institutlarının rolu” mövzusunda Ombudsmanların Beynəlxalq Simpoziumu keçirilib. 19 iyun 2025-ci il tarixində Simpozium iştirakçıları Qubaya səfər ediblər. Quba şəhərində “Soyqırımı Memorial Kompleksi”nin mətbuat katibi Abutalib Turabovun verdiyi məlumata görə, səfər çərçivəsində kompleksini ziyarət edən qonaqlar ilk olaraq 1918- ci ildə soyqırıma məruz qalmış günahsız insanların xatirəsini əbədiləşdirilən abidə önünə ehtiram əlaməti olaraq gül dəstələri düzmüşlər. Daha sonra iştirakçılara 2007-ci ilin aprel ayında Quba şəhər stadionunda təmir-qazıntı işləri aparılarkən aşkar edilmiş kütləvi məzarlıq barədə, yerli dinc əhalinin 1918-ci ildə erməni daşnak-quldur dəstələri tərəfindən soyqırıma məruz qalması və Azərbaycan Respublikasının Prezidenti cənab İlham Əliyevin 30 dekabr 2009-cu il tarixli 673№-li sərəncamına əsasən, 2012-2013-cü illərdə Heydər Əliyev Fondunun dəstəyi ilə Quba şəhərində “Soyqırım Memorial Kompleksi” inşa edilməsi haqqında geniş məlumat verilmişdir.
Sonda ziyarətçilərə soyqırımı həqiqətlərini özündə əks etdirən müxtəlif dillərdə hazırlanmış çap məhsulları o cümlədən bukletlər təqdim edilmişdir.
