“Bəzi şəxslər məhkəmədə və ya istintaqda yalan ifadə verə bilərlər və buna görə onlara qarşı məsuliyyət tədbirləri tətbiq edilə bilməz”.
Bunu vəkil Vamiq Şükürov bildirib.
O qeyd edib ki, Cinayət Məcəlləsinə əsasən, şahidlər, zərərçəkən şəxslər yalan ifadə verməyə görə cinayət məsuliyyəti daşıyırlar. Lakin qanunvericilikdə şübhəli və ya təqsirləndirilən şəxsin öz müdafiəsi çərçivəsində yalan ifadə verməsinə görə hüquqi məsuliyyət nəzərdə tutulmur.
“Eyni zamanda Azərbaycan RespublikasıKonstitusiyasının 66-cı maddəsinə əsasən, heç kəs özünə, arvadına (ərinə), övladlarına, valideynlərinə, qardaşına, bacısına qarşı ifadə verməyə məcbur edilə bilməz. Nəzərə alsaq ki, hüquq-mühafizə orqanları, polis-istintaq orqanları eyni zamanda prokurorluq orqanları şəxsin hər hansısa bir cinayətin törədilməsində təqsirli olmasını özləri sübut etməlidirlər və bunu sübut etmək vəzifəsi həmin şəxslərin, yəni təqsirləndirilən və şübhəli şəxsin borcu deyil, bu zaman həmin şəxslər susa da bilərlər. Hər hansı bir ifadə verməkdən imtina edə bilərlər və yaxud da yalan danışa bilərlər”, – deyə vəkil qeyd edib.
