25 Oktyabr tarixi Azərbaycan xalqının yaddaşına qızıl hərflərlə yazılmış şanlı bir gündür. Məhz bu tarixdə Azərbaycan Ordusu Qubadlı şəhərini işğaldan azad edərək xalqımıza böyük qürur və sevinc bəxş etmişdir. Bu hadisə təkcə bir rayonun deyil, bütövlükdə Azərbaycanın ərazi bütövlüyünün bərpası yolunda atılmış mühüm və tarixi bir addım olmuşdur. 1993-cü ildə Ermənistan silahlı qüvvələri tərəfindən işğal edilən Qubadlı rayonu illərlə həsrət içində yaşamış, lakin xalqımız heç vaxt torpaqlarını unutmamış, onların azad olunacağı günə böyük ümidlə inanmışdır. 2020-ci ilin sentyabrında başlayan Vətən müharibəsi zamanı Müzəffər Ali Baş Komandan, Prezident cənab İlham Əliyevin rəhbərliyi altında Azərbaycan Ordusu misilsiz qəhrəmanlıq nümunələri göstərərək, 25 oktyabr 2020-ci ildə Qubadlını düşmən tapdağından azad etmişdir. Qubadlının azad olunması Azərbaycan tarixində dönüş nöqtəsi olmuş, Ordumuzun yenilməzliyini, xalqımızın birliyini və dövlətimizin qüdrətini bir daha dünyaya nümayiş etdirmişdir. Qubadlı uğrunda döyüşlərdə canlarını fəda edən şəhidlərimizin xatirəsi hər zaman xalqımızın qəlbində əbədi yaşayacaqdır. Onların göstərdiyi şücaət, Vətən sevgisi və fədakarlığı gələcək nəsillər üçün ən ali nümunədir. Bu gün Qubadlı yenidən dirçəliş dövrünü yaşayır. Azad olunmuş ərazilərdə genişmiqyaslı bərpa, yenidənqurma və abadlıq işləri həyata keçirilir. Dövlətimizin dəstəyi ilə Qubadlıda yeni infrastruktur layihələri icra olunur, müasir yaşayış kompleksləri, məktəblər, tibb müəssisələri, mədəniyyət ocaqları və yollar inşa edilir. Qubadlıya həyat yenidən qayıdır. Qubadlının qədim tarixi, zəngin mədəniyyəti və təbiət gözəllikləri bu torpağı Azərbaycanın incilərindən birinə çevirir. Bu bölgə Vətənə sadiqliyi, mərdliyi və zəhmətkeş insanları ilə hər zaman seçilmişdir. Qubadlılılar tarix boyu dövlətçilik ənənələrinə bağlı olmuş, Azərbaycanın inkişafına öz töhfələrini vermişlər. Bu gün Qubadlı şəhəri günü qeyd edərkən, hər bir azərbaycanlı qəlbində dərin bir qürur hissi duyur. Qubadlının azadlığı – xalqımızın birliyinin, dövlətimizin gücünün və şəhidlərimizin müqəddəs qanının bəhrəsidir. Bu əlamətdar gün münasibətilə bütün Qubadlı sakinlərini və Azərbaycan xalqını təbrik edir, Qubadlının daha da inkişaf edəcəyinə, çiçəklənəcəyinə əminliyimizi bildiririk. Qoy üçrəngli bayrağımız Qubadlı səmasında daim dalğalansın, bu torpaq əbədi Azərbaycan torpağı kimi yaşasın! Qubadlı azaddır! Qubadlı əbədidir! Qarabağ Azərbaycandır!
Könül İbrahimova
Yasamal rayon Elm və Təhsil Nazirliyinin Fiziologiya İnstitutu üzrə ərazi partiya təşkilatının sədri
