Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən “Çıraqqala-Şabran” Dövlət Tarix-Mədəniyyət Qoruğu tərəfindən “18 Aprel – Beynəlxalq Abidələr və Tarixi Yerlər Günü” münasibətilə Qədim Şabran abidəsi ərazisində 15–18 aprel tarixlərində “Açıq qapı” günləri elan olunub.
Bu təşəbbüs çərçivəsində Şabran rayon Cəlal Məmmədov adına Aygünlü kənd tam orta ümumtəhsil məktəbinin şagird və müəllim kollektivi dünya əhəmiyyətli “Qədim Şabran” abidəsinə ekskursiya ediblər.
Səfər zamanı qoruğun əməkdaşları tərəfindən məktəblilərə “Qədim Şabran” şəhərinin yaranma tarixi, orta əsrlərdə Qafqazın mühüm ticarət və sənətkarlıq mərkəzlərindən biri kimi rolu barədə ətraflı məlumat verilib. Bildirilib ki, ərazidə aparılan arxeoloji qazıntılar nəticəsində təndirlər, su təchizatı sisteminə aid gil tünglər, təsərrüfat quyuları, müdafiə divarları, memarlıq qalıqları və digər maddi-mədəniyyət nümunələri aşkar edilib.
Qoruq əməkdaşları məktəblilərə tapılmış eksponatların tariximiz üçün əhəmiyyətindən, həmçinin ərazidə həyata keçirilən mühafizə və bərpa işlərindən bəhs ediblər. Ekskursiya iştirakçıları qədim qala divarlarını yaxından izləyərək, tarixi tikililərin memarlıq xüsusiyyətləri ilə tanış olublar.
Sonda ekskursiya iştirakçıları göstərilən diqqət və təqdim olunan ətraflı məlumatlara görə qoruq əməkdaşlarına təşəkkürlərini bildirərək, bu cür maarifləndirici səfərlərin tarixi irsə marağın artırılmasında mühüm rol oynadığını vurğulayıblar.
